गोरखा, १७ मंसिर । गोरखाको भीमसेन थापा गाउँपालिकाद्धारा आज अन्तराष्ट्रिय अपाङ्ग दिवसको अबसरमा एक दिने अभिमुखीकरण तालिम प्रदान गरिएको छ । तालिममा नेपालमा अपांगता क्षेत्रमा भएका बिभिन्न किसिमका ऐन कानुनको अबस्था लगायतको बिषयमा सहभागीहरुलाई जानकारी गराइएको आयोजकले जनाएको छ ।
त्यस्तै अपांगता भएका व्यक्तिहरुले प्राप्त गर्ने सेवा सुबिधा, अपांगता भएका व्यक्तिहरुलाई आत्मा निर्भर बनाउने योजना तथा अपंगता भएका व्यक्तिहरुको श्रेणी बिभाजन लगायतका बिषयमा अभिमुखीकरण प्रदान गरिएको हो । कार्यक्रममा भीमसेन थापा गाउँपालिका अध्यक्ष लोकप्रसाद बन्जराले भीमसेन थापा गाउँपालिकामा अपांगता तथा अशक्तहरुको हकमा बिशेष अभियान सञ्चालन गर्नका लागि भीमसेन थापा लोककल्याणकारी कोषको स्थापना गरेको समेत जानकारी दिनुभयो ।
उहाँले अपंगता भएका व्यक्तिहरुलाई समाजले हेर्ने दृष्टिकोणलाई परिवर्तन गरी उनिहरुले पनि केही गर्न सक्छन् भन्ने चेतनाको बिकास गर्नु पहिलो आबश्यकता रहेको भन्दै गाउँपालिकाले सचेतना, सिपमुलक कार्यक्रमलाई जोड दिदै आएको बताउनुभयो । अभिमुखीकरण कार्यक्रममा नेपाल अपांग संघका पूर्व सचिवालय सदस्य तथा नेपाल नेत्रहिन महासंघको केन्द्रीय महासचिव नेपाल शिशिर खनालले प्रशिक्षण प्रदान गर्नुभएको थियो ।
अपांग समाजका अध्यक्ष सन्तोष खनालको अध्यक्षतामा भएको कार्यक्रममा गाउँपालिकाकी उपाध्यक्ष अमृता वस्ती (भट्ट), बालबालिका तथा सामाजिक बिकास शाखाकी प्रमुख डिलेस्वरी बिष्ट लगायत १ सय भन्दा बढीको सहभागिता रहेको थियो । भीमसेन थापा गाउँपालिकामा १ सय १८ जना (क) बर्गका, (ख) बर्गको १३५ जना, (ग) बर्गका ५१ जना र २५ जना (घ) बर्गका सहित ३ सय २९ जना अपांगता भएका व्यक्तिहरु रहेको तथ्याङक छ ।
