गोरखा, २६ भदौ । गोरखा बारपाक सुलिकोट–५ को ताकुमाझ लाकुरीबोट स्थित जलकन्यादेबी माध्यमिक विद्यालयले आगामी शैक्षिक सत्र २०८० बाट दस जोड दुई कक्षा सञ्चालन गर्ने भएको छ । काठमाण्डौमा आयोजित एक भेलाबाट दश जोड दुई कक्षा संचालनको लागि पूर्व प्रमुख निर्बाचन आयुक्त दोलखबहादुर गुरुङको संयोजकत्वमा ११ सदस्यीय समिती समेत निर्माण गरिएको छ । बिद्यालय ब्यबस्थापन समितिको अध्यक्ष नीरबहादुर थापाको अध्यक्षतामा भएको भेलाले समिती निर्माण गरेको हो ।
भेलामा संयोजक गुरुङले कक्षा संचालन अहिलेको अपरिहार्य आवश्यकता भएको भन्दै सबैलाई सहयोग गर्न अनुरोध गर्नुभयो । गुरुङले त्यस क्षेत्रको बालबालिकाको लागि गुणस्तरीय शिक्षाको दश जोड दुई कक्षा संचालनमा आफुले सक्दो सहयोग प्रतिबद्धधता ब्यत्त गर्नु भएको थियो । भेलामा सहभागी भएकाहरुलाई विद्यालयका प्रधानाध्यापक उमाकान्त ढकालले २८ वटा पक्की कक्षा कोठा, लाईब्रेरी, कम्प्युटर ल्याब, खेलकुद मैदान लगायत सबै पुर्वाधार र सुबिधा भएकोले कक्षा सञ्चालनमा समस्या नहुने जानकारी गराउनु भयो ।
भेलामा विद्यालयका पुर्व प्रधानाध्यापक टीकादेबी गुरुङले बिगतको इतिहासबाट पाठ सिकेर अघि बढे सजिलै कक्षा संचालन गर्न सकिने बताउनुभयो । बिगतमा भौतिक पूर्वाधार र आर्थिक अभाव हुदा पनि स्थानिय अभिभावकको साथ र सहयोगले निमाबि र माबि संचालन गर्न सफल भएको भन्दै सबैको सहयोग भएको खण्डमा ११ र १२ कक्षा पनि संचालन गर्न सकिने उहाँको भनाई छ ।
भेलामा समृद्ध ताकु युवा समाजका राजु खड्का, राजन लामिछाने, राजेन्द्र रायमाझी, शिक्षा सेवी बासुदेव भट्ट ज्ञानेन्द्र भट्ट, मेघबिलास भट्ट, बिजय खडका, देबेन्द्र पोख्रेल लगायतले आ–आफ्नो धारणा राखेका थिए । यस अघि नै बिद्यालयमा भएको सर्वपक्षीय भेलाले दश जोड दुई कक्षा संचालन गर्ने निर्णय गरेको थियो । विद्यालयले व्यवस्थापनमा कम्युटर बिषय अध्यापन गराउने जनाएको छ ।
कक्षा सञ्चालनको लागि विद्यालयले ५० लाखको अक्षय कोष निर्माण गर्ने लक्ष्य राखेको छ । सो को लागि दोलखबहादुर गुरुङ र टीकादेबी गुरुङ बाट २ लाख ५० हजार, बारपाक सुलिकोट गाउँ पालिका अध्यक्ष बिष्णुप्रसाद भट्ट बाट १ लाख, पुर्व वडा अध्यक्ष गोपालबहादुर गुरुङबाट ५० हजार पदमबहादुर थापा कुमालटारीबाट ५० हजार र विद्यालयका प्रधानाध्यापक उमाकान्त ढकालले ५० हजार अक्षय कोषमा जम्मा हुने गरी प्रदान गरिसकेको पनि विद्यालयले प्रशासनले जनाएको छ ।
बि.स २००९ सालमा स्थापित सो विद्यालयले २०५१ सालबाट एसएलसी परिक्षामा सहभागी हुदै आएको छ । बिद्यायल यस बर्षको एसईईमा बारपाक सुलिकोटमै प्रथम भएको थियो ।
