गोरखा, १५ साउन । गोरखामा राष्ट्रिय परिचय पत्र दर्ता अभियान सुरु भएको छ । गोरखा नगरपालिकाको १४ वटा वडाबाट दर्ता अभियान सुरु गरिएको हो ।
नगरपालिकाको केही वडामा शुक्रबारबाट सुरु भएको दर्ता अभियान शनिबारबाट सबै वडाबाट सुरु गरिएको प्रमुख जिल्ला अधिकारी शंकरहरि आचार्यले बताउनु भयो । जनशक्ति र आवश्यक सामग्री अपुग भएका कारण एक पालिकाबाट मात्र अभियान सुरु गरिएको उहाँले जानाकारी दिनुभयो ।
३० वटा स्टेशन जडान गरेको तर दुई वटामा प्राविधिक कारण संचालन हुने नसकेको र २८ वटा स्टेशनबाट दर्ता अभियान संचालन भइरहेको राष्टिूय परिचयपत्र तथा पञ्जीकरण विभाग गोरखा जिल्लाका सुपरभाइजर विनिता ढुङ्गेलले बताउनु भयो । विभागबाट ४२ वटा मेसिन ल्याएको भएता पनि ३० स्टेशनको उपकरण मात्र राम्रो अबस्थामा रहेको र बाँकी विग्रिएका सामाग्री मर्मत संभारका लागि विभागलाई पत्रचार गरिसकेको बताएको छ ।
अभियान गोरखा नगरपालिका भित्र सम्पन्न भइसकेपछि मात्र अन्य पालिकामा विस्तार गर्ने लक्ष्य रहेको जनाएको छ । त्यस्तै, हरेक वडामा विभागबाट खटिएको दुईजना अपरेटर, रुजु गर्ने अधिकारीका रुपमा वडा सचिव र एक जना दर्ता सहयोगी रहने राष्टिूय परिचयपत्र तथा पञ्जीकरण विभागले जनाएको छ । हाल ‘अनलाइन’ र ‘अफलाइन’ गरी दुई तरिकाले परिचयपत्रको दर्ता गर्ने अभियान संचालन भइरहेका छन् । कम्तिमा ७० प्रतिशत जनसंख्यालाई राष्टिूय परिचय पत्रमा आबद्ध गराउने विभागको लक्ष्य रहेको छ ।
