गोरखा, १६ जेठ । बलात्कार मुद्धामा हद म्याद हटाउन अखिल नेपाल महिला (अनेम) संघ गोरखाले माग गरेको छ । चौथो राष्ट्रिय महिला अधिकार दिवसका अबसरमा अनेम संघ गोरखाले बलात्कार र यौनजन्य अपराधमा उजुरीका लागि राखिएको हदम्याद हटाउन माग गरेको हो ।
आज प्रमुख जिल्ला अधिकारी शंकरहरी आचार्य मार्फत प्रधानमन्त्रीलाई ज्ञापन पत्र बुझाउँदै यो विषयमा ध्यानाकर्षण गराईएको हो । संघकी जिल्ला अध्यक्ष पार्वती पाठक नेतृत्वको टोली जिल्ला प्रशासन कार्यालय पुगेर ज्ञापन पत्र बुझाएको हो ।
उजुरीका लागि हदम्याद तोकिएका कारण जघन्य अपराध बाहिर आउन नसकेको र अपराधीहरुले खुलेआम हिंसाका घटना थप्दै जाने गरेको ज्ञापन पत्रमा उल्लेख छ ।
ज्ञापन पत्रमा हिंसा पीडितको संरक्षणका लागि सबै प्रभावितलाई तत्काल क्षतिपुर्ति सहितको द्रुत न्याय प्रणाली मार्फत दोषिलाई कारबाही गर्न माग गरिएको छ ।
यस्तै, पेट्रोल, डिजेल र खाना पकाउने ग्यास लगायत दैनिक उपभोग्य वस्तुको मुल्य नियन्त्रण गरी सर्वसुलभ रुपमा उपलब्ध गराउन र कालोबजारी नियन्त्रण गर्न पनि संघले माग गरेको छ।
