गोरखा, १६ जेठ । गोरखाको एकै परिवारका चार जनाको मुस्ताङमा भएको तारा एयरको विमान दुर्घटनमा परेर मृत्यु भएको छ । आइतबार बिहान ९ः५५ बजे पोखराबाट मुस्ताङको जोमसोमतर्फ उडेको तारा एयरको जहाज १०ः०७ बजेदेखि सम्पर्कविहीन थियो।
सोमबार बिहान मुस्ताङको थासाङ गाउँपालिका वडा नम्बर २ सानुसरेमा उक्त जहाज दुर्घटनाग्रस्त अवस्थामा भेटिएको छ।
शहिद लखन गाउँपालिका ५ ताक्लुङको तीनमाने भञ्ज्याङ घर भएका ५२ वर्षका गणेशनारायण श्रेष्ठ, उहाँकी श्रीमति ४८ वर्षकी रश्मी, जेठी छोरी २३ वर्षकी रोजिना र कान्छी छोरी २० वर्षकी रविनाको मृत्यु भएको हो ।
सुरक्षा निकायले उनीहरुको मृत्युको औपचारिक पुष्टि गरिसकेको छैन तर विमानमा यात्रा गरिरहेका कोही पनि जीवित नरहेको जानकारी आएको मुस्ताङका प्रमुख जिल्ला अधिकारी नेत्रप्रसाद शर्माले बताउनुभयो ।
काठमाण्डौंमा सूचना प्रविधि सम्बन्धी सामग्रीको ब्यवसाय गर्दै आउनु भएका श्रेष्ठ तारा एयरको सो विमानमा परिवार सहित जोमसोम जान लाग्नुभएको थियो । शहिद लखन ५ को तीनमाने घर भएका श्रेष्ठ परिवार हाल काठमाण्डौंमा बस्दै आएका थिए । छोरा रोशन सहित दुबै छोरी अध्ययनका लागि अमेरिकामा थिए ।
छोरीहरु बैशाख ३० गते नेपाल आएको तीनमानेस्थित श्रेष्ठका छिमेकी बिजय पुडासैनीले बताउनुभयो । जेठी छोरी स्नातकोत्तर र विद्यावारिधी अध्ययनका लागि ५ वर्षदेखि अमेरिकामा थिइन् भने कान्छी छोरी रविना नेपालमा एलेभलको अध्ययन सकेर थप अध्ययनका लागि गत वर्षको भदौमा अमेरिका गएकी थिइन् ।
स्थानीय चुनावमा भोट हाल्न आउनेबार कुरा हुँदा छोरीहरु दुई हप्ताको लागि नेपाल आउन लागेकाले मतदानमा आउन नसक्ने बताउनुभएको रहेछ पुडासैनीले भन्नुभयो, सम्भव भएसम्म परिवार सहित आउँछु भन्नुभएको थियो ।
ब्यवसायिक कामले काठमाण्डौं बस्दै आएपनि गाऊँघरमा हुने विकास निर्माण लगायतका काममा उहाँले सहयोग गर्दै आएको तीनमानेस्थित श्रेष्ठ परिवारका छिमेकीहरुले बताएका छन् । स्थानीय जलदेवी माध्यमिक विद्यालयमा उहाँको एकल सहयोगमा कम्प्युटर ल्याव स्थापना भएको छ ।
यस्तै ताक्लुङकै चन्द्रकला प्रावि र दूर्गा प्राविका लागि पनि उहाँले विभिन्न सहयोग उपलब्ध गराउनुभएको श्रेष्ठका आफन्त केशर श्रेष्ठले बताउनुभयो । उहाँले काठमाण्डौं र गोरखामा बराबरी बस्छु भन्ने योजना बनाउनु भएको पुडासैनीले बताउनु भयो । उहाँले भूकम्पले पुरानो घर भत्किएपछि नयाँ घर बनाउन थाल्नुभएको थियो ।
आइतवार बिहानदेखि हराएको विमानमा बुबा, आमा र दुई बहिनी समेत यात्रा गरिरहेको खबर पाए लगत्तै अमेरिकामै रहेका छोरा रोशन श्रेष्ठ नेपाल आउने क्रममा रहेको पनि उहाँले जानकारी दिनुभयो ।
आफ्नो गाऊँका एकै परिवारका ४ जनाको मृत्यु भएपछि तीनमाने भञ्ज्याङ गाऊँ शोकमा डुबेको छ । आइतवार बिहान विमान हराएको र त्यसमा गणेशनारायण श्रेष्ठको परिवारका ४ जनाले पनि यात्रा गरिरहेको खबर पाए लगत्तै छिमेकीहरु नियमित काममा लाग्न नसकेको वडाध्यक्ष यमबहादुर रानाले बताउनुभयो ।
छिमेकीहरु पसल ब्यवसाय बन्द गरेर बसेका छन् । गाऊँपालिका अध्यक्ष रमेश थापामगर, वडाध्यक्ष राना, गणेशनारायणका आफन्त केशर श्रेष्ठ, छिमेकी विजय पुडासैनी जहाज दुर्घटनाबारे बुझ्न आइतवार दिउँसो पोखरा पुग्नुभएको थियो ।
सोमवार बिहान दुर्घटनाग्रस्त अवस्थामा जहाज फेला परेको र सबै यात्रीको मृत्यु भएको खबर पोखरा पुगेको टोलीले गराएको थियो । तीनमानेभञ्ज्याङका बासिन्दा आपसमा जम्मा भएर गणेशनारायण श्रेष्ठ परिवारले गरेको समाजसेवाको कामको चर्चा गरेर बसेका वडाध्यक्ष रानाले जानकारी दिनुभयो ।
शव काठमाण्डौंस्थित त्रिभुवन विश्वविद्यालय शिक्षण अस्पतालमा ल्याउने जानकारी पाएपछि केही आफन्त र छिमेकी भने बिहानै काठमाण्डौं गएका छन् ।
तारा एयरको ९ एन एइटी जहाजमा उनीहरूसहित २२ जना थिए।
जहाज क्याप्टेन प्रभाकर घिमिरे र उत्सव पोखरेलले उडाएका थिए। एयर होस्टेस कृष्मी थापा हुनु हुन्थ्यो भने १९ जना यात्रु थिए।
