गोरखा, १२ जेठ । गोरखाको आरुघाट गाउँपालिका वडा नम्बर ३ स्वाँराका यानबहादुर थापाले विश्वको सर्वोच्च शिखर सगरमाथाको सफल आरोहण गरेका छन् ।
हिमालय सेफर्ड इको टुरिजम कम्पनीमार्फत ३३ वर्षीय थापाले जेठ १ गते सगरमाथाको सफल आरोहण गरेका हुन् ।
सगरमाथाको चुचुरोमा पुग्न आधार शिविरबाट तीन दिन लागेको तर फर्किन एक दिन मात्रै लागेको उहाँले बताउनु भयो । थापा ट्रेकिङ गाईडको काम गर्नु हुन्थ्यो ।
धेरै पहिलेदेखि सगरमाथा आरोहण गर्ने चाहना भएको र माउन्टेन गाईडको रुपमा अहिले सफल आरोहणको अवसर मिलको उहाँको भनाई छ । आफु आरोहीको रुपमा नभई गाईडको रुपमा आरोहण गरेको उहाँले जानकारी दिनु भयो ।
टुरिजम आफ्नो पेशा भएकाले यसलाई ब्यवशायिक रुपमा अघि बढाउन अब अझै सजिलो हुने उहाँले अपेक्षा राख्नु भएको छ । वकिल बिष्णुप्रसाद भुषाल, डाक्टर कृति भुषाल र थापा सहितको तीन जनाको टोलीले एकैसाथ सगरमाथाको आरोहण गरेको थियो ।
