गोरखा, १५ चैत । नेकपा माओबादी केन्द्र भीमसेन थापा गाउँपालिका वडा नम्बर ७ र ८ मा वडापार्टी बैठक तथा प्रशिक्षण कार्यक्रम सोमबार सम्पन्न भएको छ । आगामी स्थानीय तहको निर्वाचनलाई लक्षित गरेर दुवै वडाका पार्टी समितिको बैठक तथा प्रशिक्षण कार्यक्रम सम्पन्न गरीएको गाउँपालिका अध्यक्ष बिनोद पाण्डेले जानकारी दिनुभयो । बैठकमा पार्टीका गण्डकी प्रदेश समितिका सल्लाहकार गोपाल बराइलीले निर्वाचनमा माओबादीले नजिते देशमा प्राप्त राजनीतिक उपलब्धीको रक्षा हुन नसक्ने बताउनुभयो ।
उहाँले संघियता गणतन्त्र धर्मनिरपेक्षत, समानुपातिकता तथा दलित, बिपन्न समुदायका अधिकारी स्थापित गर्न माओबादी भूमिका खेलेको भन्दै त्यसको कार्यान्वयनका लागि निर्वाचन जित्नै पर्ने उल्लेख गर्नुभयो । बराइलीले अघिल्लो निर्वाचन माओबादीले हार्दा भीमसेन थापा बिकास निर्माणको काम पछाडी परेको पालिका भित्रका नागरिकहरुले अनुभूति गरेको बताउनुभयो । उहाँले माओबादी जितेका जिल्लाका २ पालिका उत्कृष्ठ पालिका बनेको उधाहरण दिदै परिवर्तनको एजेण्डा बोकेको माओबादीको पराजयले परिवर्तनको पराजय हुने बताउनुभयो ।
कार्यक्रममा भीमसेन थापा गाउँपालिका अध्यक्ष बिनोद पाण्डेले वडा भित्र निर्वाचन प्रचारप्रसारको अभियान भोलीदेखि थाल्न दुवै वडा पार्टी समितिलाई निर्देशन दिनुभयो । उहाँले भीमसेन थापा गाउँपालिकामा यही चैत मसान्तसम्म पहिलो चरणको प्रचारको अभियान सक्ने योजनामा पार्टीले तय गरेको भन्दै लगत्तै दोस्रो चरणको अभियान सञ्चालन गर्ने बताउनुभयो ।
अध्यक्ष पाण्डेले आगामी निर्वाचनमा भीमसेन थापा गाउँपालिकामा माओबादी केन्द्रको बिजयी सुनिश्चित रहेको दावी समेत गर्नुभयो । कार्यक्रममा भीमसने थापा गाउँपालिकाका वाइसिएल इन्चार्ज सागर श्रेष्ठ, गाउँपालिका पार्टी समितिका उपाध्यक्ष एवंम वडा नम्बर ७ का वडाध्यक्ष नारायण श्रेष्ठ लगायतले प्रशिक्षण मुलक मन्तव्य राखेका थिए । यसै बिच आज दुवै वडामा दलित महिला तथा वाइसिएलको वडा स्तरीय समिति गठन भएको सो पाटीले जनाएको छ ।
