काठमाण्डौ १, पुस । गोरखाका एक युवा ठगीको आरोपमा पक्राउ परेका छन् । जिल्लाको सहिद लखन गाउँपालिका वडा नम्बर २ घर भएका गणेशराज अर्याललाई ठगी गरेको आरोपमा प्रहरीले पक्राउ गरेको जनाएको छ । युवाहरुलाई जागिर लगाईदिने आश्वासन दिँदै ठगी गर्दै आएको आरोपमा ३८ वर्षीय अर्याललाई विराटनगर महानगरपालिका वडा नम्बर १० स्थित बसपार्कबाट पक्राउ गरिएको हो ।
उनले उदयपुरको त्रियुगा नगरपालिका ८ का उमेशकुमार दनुवार र प्रेमकुमार दनुवारलाई जागिर लगाइदिने आश्वासन दिँदै पटकपटक रकम लिएको भन्दै प्रहरी समक्ष उजुरी परेको छ । पीडितको उजुरीका आधारमा १ नं. प्रदेश प्रहरी कार्यालयले पक्राउ गरिएको प्रदेश प्रहरी प्रवक्ता एसपी नवीनराज राईले जानकारी दिनुभयो ।
उहाँका अनुसार पक्राउ परेको अर्यालले दनुवारद्वयबाट १ लाख ७३ हजार रकम ठगी गरेको उजुरी परेको छ । उनले अन्य युवालाई पनि यसरी ठगेको हुनसक्ने अनुमान प्रहरीले गरेको छ । जिल्ला प्रहरी मोरङको नियन्त्रणमा राखिएका अर्याल माथि जिल्ला अदालतको आदेश अनुसार म्याद थप गरेर अनुसन्धान अघि बढाइएको छ ।
अर्यालमाथि ठगी मुद्धामा कारबाही गर्ने गरी प्रक्रिया अघि बढाइएको एपसी राईले जानकारी दिनुभयो ।
