काठमाण्डौं ४, कात्तिक । अबैध जुवातास खेलिरहेका बेला ३४ जनालाई प्रहरीले पक्राउ गरेको छ । सुर्खेत, ललितपुर र डडेल्धुराबाट जुवातास खेल्दै गर्दा प्रहरीले उनिहरुलाई पक्राउ गरेको हो । प्राप्त जानकारी अनुसार सुर्खेतको वीरेन्द्रनगर नगरपालिका ६ गोदाम लाईनस्थित सम्राट होटेलमा तास खेलिरहेको अवस्थामा होटल संचालक र सोही ठाउँ बस्ने २९ वर्षीय सुरेन्द्र शाही लगायत ७ जनालाई बुधबार राती प्रहरीले पक्राउ गरेको हो ।
उक्त होटलमा जुवातास खेलिरहेको भन्ने सूचनाको आधारमा जिल्ला प्रहरी कार्यालय सुर्खेतबाट खटिएको प्रहरी टोलीले उनीहरूलाई नगद ७४ हजार ३७५ रुपैयाँ र १ बुक तास सहित पक्राउ गरेको जनाएको छ । यता ललितपुरको ललितपुर महानगरपालिका २३ को हात्तिवनस्थित टहरोमा तास खेलिरहेकामोरङ सानेपोखरी गाउँपालिका १ घर भएका ४७ वर्षीय निलबहादुर पुलामी मगर लगायत ५ जनालाई बुधबार राती प्रहरी टोलीले पक्राउ गरेको हो ।
उक्त स्थानमा जुवातास खेलिरहेको भन्ने सूचनाको आधारमा महानगरीय प्रहरी वृत्त सातदोबाटोबाट खटिएको प्रहरीको टोलीले उनीहरूलाई नगद ८४ हजार ९० रुपैयाँ र १ बुक तास सहित पक्राउ गरेको महानगरीय प्रहरी वृत्त सातदोबाटोले जनाएको छ ।त्यस्तै गरी डडेल्धुराको अमरगढी नगरपालिका ५ जिलोडास्थित पदम राज ओझाको घरबाट तास खेलिरहेको अवस्थामा सोही नगरपालिका ४ का ५० वर्षीय ईन्द्रबहादुर थापा सहित २२ जनालाई पनि बुधबार राति प्रहरीले पक्राउ गरेको छ ।
ओझाको घरमा जुवातास खेलिरहेको भन्ने सूचनाको आधारमा जिल्ला प्रहरी कार्यालय डडेल्धुराबाट खटिएको प्रहरी टोलीले उनीहरूलाई नगद ९३ हजार ९६० रुपैयाँ र ४ बुक तास सहित पक्राउ गरेको डडेल्धुरा प्रहरीले जनाएको छ । पक्राउ परेका सबैलाई जुवा ऐन अन्तरर्गत मुद्वा दर्ता गरी अनुसन्धान अघि बढाइको प्रहरीले जानकारी दिएको छ ।
