गोरखा १५, असोज । गोरखा नगरपालिकाका बिधालय कर्मचारीले बजेट भाषणमा घोषणा गरिए अनुसार तलबबृद्धि नगरेको भन्दै ध्यानकर्षण पत्र बुझाएका छन् । नगरपालिकाका कर्मचारीहरुले नगरपालिकालाई बुझाएको ध्यानकर्षण पत्रमा नीतिगत तथा मानविय श्रम शोषण नगर्न आग्रह समेत गरिएको छ ।
उनिहरुले गोरखा नगरपालिकाको शिक्षा शाखामार्फत माग फाराम भर्ने सन्दर्भमा प्रशारित सूचनालाई आधार मान्दा कुनै पनि थप रकम पालिकाबाट थप गर्न नसकिने भन्ने उल्लेख भएको भन्दै आपत्ती जनाएका छन् । नेपाल सरकारबाट स्वीकृत भएअनुसार केही पालिकाहरुले सोही अनुसारको निर्णयको आधारमा सुविधा थप गरी पारिश्रमिक निकासा गरेको र बाँकीले पनि वृद्धि गर्ने तयारी गरिरहेको भएपनि गोरखा नगरपालिकाले भने सुविधा थप गर्न नसक्नु भन्नुले बिधालय कर्मचारीको शोषण गर्ने मनासाय रहेको दावी उनिहरुको रहेकोे छ ।
ध्यानाकर्षण पत्रमा थप सुविधा दिने सन्दर्भमा नगरपालिकाले किन यति धेरै कञ्जुस्याईँ गरेको हो भनेर प्रश्न समेत उठाएका छन् । उनिहरुले विधिको शासन र नीतिको कार्यान्वयनलाई सार्थक बनाउन कम्तिमा श्रमऐन अनुसार पारिश्रमिक दिन समेत नगरपालिकालाई आग्रह गरेका छन् । आफुहरुको माग सम्बोधन नभए आन्दोलनमा जान बाध्य हुने बिधालय कर्मचारीहरुको चेतावनी रहेको छ । नगरपालिकालाई बुझाइएको ज्ञापन पत्रमा विभिन्न १३ वटा विद्यालयका कर्मचारीहरुले हस्ताक्षर गरेका छन् ।
