काठमाण्डौ २९, भदौं । आफ्नै ८ महिनाको नावालक छोरोको हत्या गरेको आरोपमा प्रहरीले एक दम्पतीलाई पक्राउ गरेको छ । रुपन्देही गैडहवा गाउँपालिका वडा नम्बर ६ का श्रीराम मल्लाह र उहाँकी श्रीमती रेनु मल्लाहलाई नावालक छोराको हत्याको आरोपमा पक्राउ गरिएको प्रहरीले जनाएको छ ।
यहीँ भदौ २६ गते राति १ बजे ८ महिनाका नाबालक सुरज मल्लाहको घाँटी रेटी हत्या भएको थियो। घटनास्थलको स्थलगत अवलोकनका क्रममा घरको छलमा रगत देखिएपछि अनुसन्धानका लागि दम्पतीलाई नै नियन्त्रणमा लिइएको प्रहरी उपरीक्षक मनोज केसीले जानकारी दिनुभयो ।
‘दम्पती सुत्ने कोठाको टेवलमा समेत रगत लागेको भेटिएको, उहाँले भन्नुभयो, ‘हँसिया र ओछ्यानमा समेत रगत लागेको भेटिएपछि थप अनुसन्धान अघि बढाइएको छ ।’ पक्राउ परेका दम्पतीले हत्या गरेको स्विकार गरेको प्रहरीको भनाई छ । घटनाको थप अनुसन्धान भइरहेको प्रहरीले जनाएको छ ।
