गोरखा, २ असार : ठोटनेरी खोलाले बगाएर मंगलबार बेपत्ता भएका एक गोबिन्द चौधरीको शव आज भेटिएको छ । आरुघाट गाउँपालिका–२ ढोडेनीमा स्थित ठोटनेरी खोला तर्ने क्रममा बेपत्ता भएका बर्दिया राजापुर नगरपालिका वडा नम्बर ७ का गोबिन्द चौधरीको शव भेटिएको जिल्ला प्रहरी कार्यालय गोरखाका डिएसपी प्रकाश दाहालले जानकारी दिनुभयो ।
चौधरीको शव मान्द्रेथोक भन्ने स्थानमा फेला परेको उहाँको भनाई छ । बगाएको स्थानदेखि करिब २ किलोमिटर तल मान्द्रेथोक भन्ने स्थानमा खोलामा ढुङ्गाको चेपुवामा शव फेला परेको डिएसपी दाहालले बताउनुभयो ।
जिल्ला भित्र सवारी साधन मर्मत गर्दै आउनु भएका चौधरीलाई हिजो बिहान अरु ३ जना साथीहरु संगै खोला तर्ने क्रममा खोलामा आएको बाढीले बगाएको थियो । मृतकको शवको आज नै पोष्टमार्टम गरि परिवारलाई बुझाइएको प्रहरीले जनाएको छ ।
