गोरखा, २८ जेठ : गोरखाको पालुङटार नगरपालिका–७, स्थित कोलडाँडा क्षेत्रबाट अबैध सालको काठ सहित दुई जनालाई प्रहरीले हिजो पक्राउ गरेको छ । कोलडाँडाबाट आलेबर्दा तर्फ जाँदै गरेको ग १ त ४६०१ नम्बरको ट्याक्टरमा सालको काठ लोड गरेर लैजादै गरेको अबस्था उनिहरुलाई पक्राउ गरिएको जिल्ला प्रहरी कार्यालय गोरखाका प्रहरी नायब उपरीक्षक (डिएसपी) प्रकाश दाहालले जानकारी दिनुभयो ।
पक्राउ पर्नेहरुमा स्थानीय कोलडाँडा घर भएका २८ बर्षका चन्द्र बोटे र ६२ बर्षका बुद्धि कुमाल रहेको उहाँले बताउनुभयो । साँझपख लुकीछिपी काठ लैजादै गर्दा प्रहरीले उनिहरुलाई पक्राउ गरेको डिएसपी दाहालको भनाई छ ।
ट्याक्टर सहित नियन्त्रणमा लिइएको काठ करिब ५९ दशमलव ७१ क्युफिट रहेको उहाँले बताउनुभयो । पक्राउ परेका दुवैजना सहित नियन्त्रणमा लिइएको ट्याक्टर र काठ डिभिजन बन कार्यालय गोरखामा बुझाइएको प्रहरीले जनाएको छ । नियन्त्रणमा लिइएको काठ गोलिया काठ भएको र पक्राउ परेकाहरुले भने घर बनाउनका लागि चिरान गर्न लैजान लागेको बताएको छन् ।
