लमजुङ, १६ जेठ । लगातारको बर्षा पछि आएको बाढीले ४ घर भत्काएको छ भने ४० भन्दा बढी घर परिवार प्रभावित भएका छन् । मनाङ जिल्ला सदरमुकाम चामेमा एक पक्की घरसहित चार टहरामा पूर्ण क्षति पुगेको जिल्ला प्रहरी कार्यालय मनाङले जनाएको छ । बाढीले प्रभावित बनाएका घरपरिवारलाई सुरक्षित स्थानमा स्थानान्तरण गरिएको छ ।
प्रहरीका अनुसार स्थानीय खोलामा आएको बाढीले गर्दा सदरमुकाम चामेमा एक पक्की घरसहित चार टहरामा पूर्ण क्षति पुगेको हो । ३८ घरमा बाढीले ल्याएको गेग्¥यान, बालुवा, ढुंगा तथा माटोसहितको लेदो पसेर बस्न नहुने अवस्था बनाएको छ । जिल्ला प्रहरी कार्यालय मनाङका प्रहरी नायव उपरीक्षक सुवास खड्काका अनुसार जिल्ला सदरमुकाम रहेको चामे गाउँपालिका–४ स्थित नयाँबजारको घट्टेखोलामा अचानक पानीको बहाव बढ्न गई सोही स्थानमा रहेको पक्की पुललाई काठ, ढुंगा र माटोले पुरी उक्त खोलाको पानी नयाँबजारतर्फ पसेको थियो ।
प्रमुख जिल्ला अधिकारी विष्णु लामिछानेले पक्की पुलको वरिपरिको भाग समेत बाढीले बगाएको जानकारी दिनुभयो । मनाङमा बाढी आउँदा बिहीबार मात्रै २ वटा काठे पुल बगाएको थियो । विभिन्न ठाउँमा बाटो अवरुद्ध छ । चामे गाउँपालिका–१, तिमाङ खोलामा बाढीले मानिस हिँड्ने काठे पुल बगाएको छ ।
