गोरखा १३, जेठ । गोरखाको बारपाक सुलिकोट गाउँपालिकाको वडा नम्बर १ र २ बारपाकमा कोरोना संक्रमणसंग मिल्दोजुल्दो लक्षण भएका बिरामीको संख्या बढदै थालेपछि भोली स्वास्थ्यकर्मी सहितको टोली त्यस क्षेत्रमा पठाइने भएको छ । आज बसेको जिल्ला स्तरीय कोभिड १० संकट व्यवस्थापन केन्द्रको बैठकले गोरखा अस्पतालका डा. सन्दिप श्रेष्ठको संयोजकत्वमा चिकित्सको टोली बारपाक पठाउने निर्णय गरेको प्रमुख जिल्ला अधिकारी शालिकग्राम शर्मा पौडेलले जानकारी दिनुभयो ।
बारपाकमा कोरोना संग मिल्दोजुल्दो लक्षण देखिएका केही व्यक्तिको मृत्यु समेत भइसकेको भन्दै केन्द्रको बैठकले तत्काल चिकित्सक सहितको टोली पठाउन लागिएको हो । टोलीमा स्वास्थ्य कार्यालय गोरखाका ल्याव टेक्निसियन नारायणबाबु अर्याल, गोरखा अस्पतालका ल्याव टेक्निसियन चिजकुमार श्रेष्ठ र सहयोगीका रुपमा राजु रोक्कालाई पठाउने निर्णय भएको उहाँको भनाई छ ।
त्यस्तै गण्डकी प्रदेश सामाजिक बिकास मन्त्रालय, गण्डकी प्रदेश पोखराबाट ३ जना चिकित्सक, र ३ जना ल्याव टेक्निसियनमा टोलीमा सहभागी हुने प्रमुख जिल्ला अधिकारी शर्माले जानकारी दिनुभयो । कोभिड परीक्षणका क्रममा खटिने स्वास्थ्यकर्मीहरुको टोलीको सुरक्षाका लागि प्रहरी निरीक्षकको कमाण्ड सुरक्षाकर्मी परिचालन गर्ने निर्णय समेत डिसिसिएमसीको बैठकले गरेको उहाँले बताउनुभयो ।
डिसिएमसीका संयोजक तथा प्रमुख जिल्ला अधिकारी पौडेलको अध्यक्षतामा बसेको बैठकमा बारपाक सुलिकोट गाउँपालिका अध्यक्ष बिष्णुप्रसाद भट्ट, स्वास्थ्य कार्यालय गोरखाका निमित्त प्रमुख नरजंग ठकुरी लगायतको पनि सहभागिता रहेको थियो
