गोरखा ३०, बैशाख । गोरखाको भीमसेन थापा गाउँपालिका–७ बोर्लाङमा कोरोना संक्रमण फैलिदै गएपछि यही जेठ ६ र ७ गते नेवार समुदायले गर्ने देवाली पुजामा रोक लगाएको छ । वडाभित्र संक्रमितको संख्या अत्याधिक भएपछि वडा कार्यालयले नेवार समुदायको देवाली पुजासमेत गर्न रोक लगाएको वडाध्यक्ष नारायण श्रेष्ठले जानकारी दिनुभयो ।
वडा कार्यालयले सूचना नै निकालेर अर्को सूचना जारी नभएसम्मका लागि वडा भित्र कुनै पनि पुजाआजा गर्न नपाउने निर्णय गरेको हो । सूचनामा गाउँघरमा हुने भोजभतेर, कुल देवता पूजा, जमघट,खेलकुद, एक घरबाट अर्को घरमा जाने क्रियाकलापहरु अर्को सूचना जारी नहुँदासम्म नगर्न र नगराउन भनिएको छ ।
त्यस्तै वडा पालिका र जिल्ला प्रसासन कार्यालयले जारीको भएको आदेश अक्षरस पालना गर्न वडाले आग्रह गरेको छ । त्यस्तै स्वास्थ्य समस्या परेका नागरिहरुले सम्बन्धित निकायबाट सहयोग लिन र स्वास्थ्य मापदण्ड पालना गर्न वडा अध्यक्ष श्रेष्ठले आग्रह गर्नुभएको छ ।
