गोरखा २६, बैशाख । गोरखामा कोरोना भाइरसका संक्रमितहरुको उपचारका लागि कोभिड अस्पताल निर्माण गर्न गोरखाका नागरिक समाजले माग गरेका छन् । जिल्ला समन्वय समितीका प्रमुख अशोक गुरुङ र प्रमुख जिल्ला अधिकारी शालिग्राम पौडेललाई आइतबार ज्ञापन पत्र बुझाउदै जिल्ला स्थित नागरिक समाज संघसस्थाका प्रतिनिधीहरुले तत्काल मास आइसोलेसन निर्माण गर्न माग गरेका हुन ।
मास आइसोलेसन नहुदा कोभिडका बिरामीले उपचार नपाउने अवस्था सिर्जना बनेको भन्दै ज्ञापन पत्रमा तत्काल अक्सिजन, आइसियूसहितको आइसोलेसन निर्माण गरी सञ्चालनमा ल्याउनुपर्ने उल्लेख छ । कोभिड १९ को प्रकोप देशभर व्यापक बन्दै गइरहेका बेला संक्रमितको उपचारका निमित्त साधारण तथा अक्सिजन सेवा सहितका शैया लगायतका सेवाहरुको अभाव रहेको जनगुनासो र सूचनाहरु आइरहेका छन, ज्ञापन पत्रमा भनिएको जसले गर्दा कोभिड १९ को महामारीले भयावह निम्त्याउने खतरा रहेको छ ।
नागरिक समाजले जिल्लामा रहेका अन्य नीजि अस्पतालहरुलाई समेत कोभिड अस्पतालका रुपमा सञ्चालन गर्नुपर्ने माग गरेका छन् । त्यस्तै जिल्ला भित्र अक्सिजन सिलिण्डरको ब्यवस्थापन गर्न, कन्ट्राक्ट ट्रेसिङ र पिसिआर परिक्षणको दायरा फराकिलो बनाउन, अक्सिजन बैंक निर्माण गर्न माग गरेका छन् । ज्ञापन पत्र मार्फत निषेधाज्ञालाई मौका छोपी स्वास्थ्य तथा खाद्यान्न सामाग्रीहरुमा हुन सक्ने कालोबजारी रोक्न नियमित अनुगमन तथा निगरानी गर्न ध्यानकर्षण समेत गरिएको छ ।
ज्ञापन पत्रमा नागरिक साझा सवाल गोरखाका संयोजक स्थानेश्वर दुवाडी, नेपाल पत्रकार महासंघ गोरखाका अध्यक्ष नरहरी सापकोटा, गैसस महासंघ गोरखाका अध्यक्ष सीताराम श्रेष्ठ र सोच नेपालका जिल्ला प्रतिनिधी मोहसिन अलि मियाँले हस्ताक्षर गरेका छन् । नागरिक समाजको ज्ञापन पत्र बुझ्दै जिल्ला समन्वय समितीका प्रमुख गुरुङ र प्रजिअ पौडेलले नागरिक समाजको सुझावलाई गम्भिरता पूर्वक लिएर आगामी दिनमा कार्ययोजना सहित अघि बढ्ने प्रतिवद्धता ब्यक्त गरेका छन् ।
