गोरखा १, चैत । पछिल्लो समय चोरीको घटना बढ्दै गएको गोरखा सदरमुकाम क्षेत्रमा आइतबार फेरी अर्को चोरीको घटना भएको छ । गोरखा नगरपालिका वडा नम्बर ६ स्थित खेलकुद मैदान नजिकै एक घरमा दिउँसोको समयमा सुनका गरगहना सहित नगद चोरी भएको प्रहरीले जनाएको छ ।
खेलकुद मैदान नजिक डेराबाट करिब ३ तोला सुन र नगद २२ हजार चोरी भएको पिडित सुस्मा श्रेष्ठले बताउनुभयो । कोठामा कोही पनि नभएको अबस्थामा ढोका फोरेर चोरी गरेको भेटिएको स्थानीयको भनाई छ । घर बाहिर रहेकी श्रेष्ठ दिउँसो करिब २ बजेको समयमा कोठमा पुग्दा चोरी भएको देखेपछि छिमेकीलाई खबर गर्नुभएको थियो ।
घटनाको सम्बन्धमा प्रहरीलाई जानकारी गराइएको भएपनि कसले चोरी गरेको हो भन्ने बारेमा भने खुल्न नसकेको स्थानीयले बताएका छन् । घटनाको थप अनुसन्धान भइरहेको जिल्ला प्रहरी कार्यालय गोरखाका प्रहरी नायव उपरीक्षक प्रकाश दाहालले जानकारी दिनुभयो । पिडित श्रेष्ठ सदरमुकाममा सिलाई व्यवसाय गर्दैै आउनु भएको छ ।
