गोरखा १३, फागुन । लियो क्लब अफ गोरखाले बुधबार आयोजना गरेको सुस्त गतिमा मोटरसाईकल चलाउने प्रतियोगिताको उपाधी आशिष भट्टले जित्नु भएको छ । देशभर पछिल्लो समय देशभर तिब्र गतिमा सवारी चलाउँदा दुर्घटना बढेको भन्दै दुर्घटना न्न्यूनिकरणका जनचेतना फैलाउने उद्देस्यले आयोजना गरिएको प्रतियोगितामा भट्टले प्रतिस्पर्धीहरु मध्ये १ सय मिटरको दुरी पार गर्न सवै भन्दा लामो समय लगाएर प्रथम हुन सफल हुनुभएको हो । प्रतियोगितामा राजु खान दोस्रो र विकल बस्नेत तेस्रो हुनुभएको आयोजकले जनाएको छ ।
प्रतियोगितामा कुल ५६ जना सहभागीता रहेको थियो । जिल्ला ट्राफिक कार्यलय गोरखाको समन्वयमा भएको उक्त प्रतियोगिताले सुस्त गतिमा सवारी चलाउन सके दुर्घटनाबाट जोगिन सकिने सन्देष दिएको गोरखाका ट्रापिक प्रहरी प्रमुख मित्रलाल ढकालले जानकारी दिनुभयो । उहाँले दुर्घटना रोकथाम र न्युनीकरणका लागि क्लबले गरेको कार्यक्रम नयाँ र फरक खालको रहेको भन्दै यसबाट दुर्घटना रोक्न सवैले मनन गर्नुपर्नेमा जोडदिनुभयो ।
क्लबले प्रतियोगितामा सहभागीबाट संकलन गरिएको प्रवेश शुल्कबाट उठेको रकम गोरखा जिल्लाका श्रवण क्षमता कमजोर भएका विद्यार्थीहरुका लागि श्रवण मेसिन खरिद गर्न खर्च गरिने जनाएको छ । गोरखा सदरमुकामको बसपार्कमा भएको कार्यक्रममा जिल्ला ट्राफिक कार्यलय गोरखाका प्रमुख मित्रलाल ढकाल, क्लबकी अध्यक्ष गंगा श्रेष्ठ, क्लवका सल्लाहाकार श्याम बाबु जोशि, लगायतको सहभागिता रहेको थियो ।
