धादिङ १, फागुन । धादिङको बेनीघाट रोराङ गाउँपालिका–७ चरौँदीमा सवारी दुर्घटनामा परि दुई जनाको मृत्यु भएको छ । शनिबार बिहान नवलपरासीबाट काठमाडौँतर्फ आउँदै गरेको बा३ख ८४ नम्बरको माइक्रोबस र सडकमा रोकिरहेको ना ६ख ४६० नम्बरको मालवाहक ट्रकमा ठक्कर खाँदा दुर्घटना भएको जिल्ला प्रहरी कार्यालय धादिङले जनाएको छ ।
दुर्घटनामा परि मृत्यु हुनेहरूमा नवलपरासी देउचुली–१६ का ५० वर्षीया हीरामाया गुरुङ र सोही ठाउँकी ६५ वर्षीया कृष्णकुमारी केसी रहनु भएको इलाका प्रहरी कार्यालय गजुरीका प्रहरी नायब उपरीक्षक युवराज खड्काले जानकारी दिनुभयो। दुर्घटनामा ६ जना घाइते भएका छन् ।
घाइतेमध्ये तीनजनालाई थप उपचारका लागि चितवन पठाइएको, दुईजनाको राजमार्ग सामुदायिक अस्पतालमा उपचार भइरहेको र एक घाइतेलाई सामान्य उपचारपछि घर पठाइएको प्रहरी नायब उपरीक्षक खड्काले जानकारी दिनुभयो ।
