जुम्ला १८, पुस । चिसो बढेसँगै जुम्लामा कोरोना भाईरस सङ्क्रमणको जोखिम समेत बढेको छ । जाडोको कारणले पानी बढी प्रयोग गर्न नसकिने र हात मुख सफा गर्न नसकिने अवस्थामा विद्यार्थीहरुको भौतिक उपस्थिति गराई पठनपाठन भइरहेका विद्यालयमा जोखिम झनै बढेको छ । कोरोना भाइरसबाट बँच्न माक्स प्रयोग गर्ने, हात धुने, स्यानिटाइजर प्रयोग गर्ने र भौतिक दुरी कायम गर्ने भनिए पनि जुम्लाका विद्यालयमा त्यस्तो अवस्था छैन ।
विद्यालयमा अहिलेसम्म कोरोना परिक्षण नहँुदा ढुक्कले पढ्ने वातावरण नभएको विद्यार्थीहरु बताउँछन् । सुरु सुरुमा विद्यालय आउदा तामक्रम नाप्ने गरेपनि अहिले विस्तारै हराउँदै गएको कर्णाली माद्यमिक विद्यालय अनामनगरका छात्रा रोशनी बुढा बताउँनुहुन्छ । जल तथा मौसम विज्ञान फिल्ड कार्यालय जुम्लाका अनुसार अहिले जुम्लाको तापक्रम माईनसमा छ । धारामा बरफ जम्न सुरु भइसकेको छ । विगतका वर्षमा यतिबेला विद्यालय बन्द हुन्थे ।
तर यसपाली विद्यालयहरु सञ्चालनमा छन् । कक्षाकोठा भित्र चिसोको सास्ती मात्रै होईन कोरोना सङ्क्रमणको त्रास पनि छ । चिसो धेरै बढेपछि कतिपय विद्यालय बन्द गर्न थालिएको छ । कर्णाली स्वास्थ्य विज्ञान प्रतिष्ठान जुम्लाका प्राध्यापक बालरोग विशेषज्ञ डा. सुनिल बुढाथोकी कोरोना भाइरस जाडो र सुख्खा मौसममा बढी सक्रिय हुने गरेको विभिन्न अध्ययनले देखाएको बताउनुहुन्छ । प्रमुख जिल्ला अधिकारी भुपेन्द्र थापाका अनुसार सरकारले कोरोना सङ्क्रमण नभएका ठाउँमा स्थानीय तहले विद्यालय सञ्चालन गर्न सक्ने गरी सहमति दिएको हो ।
जनस्वास्थ्य र सुरक्षाका मापदण्डलाई परिपालन गरी कोरोना सङ्क्रमणको जोखिम नभएका समुदायमा विद्यालय सञ्चालन गर्न सकिने भनिएको छ । तर जुम्लामा जोखिमलाई ध्यानमा नराखेरै विद्यालय सञ्चालन गरिंदा समस्या भएको उहाँको भनाई छ । विद्यालयको हेलचेक्राई बढेको भन्दै, मापदण्ड पूरा नगरी पठनपाठन गर्न नहुने र विद्यालयमा पनि कोरोना परिक्षण हुनु पर्ने आवाज उठ्न थालेको छ ।
