गोरखा १७, साउन । भ्रष्टाचारविरुद्ध खरो अभिव्यक्ति दिँदै आएका उपसचिव प्रेमप्रसाद सञ्जेल माथि शनिबार बिहान करिब ११ बजे कार्यकक्षमै कुटपिट भएको । श्रम तथा रोजगार कार्यालय विराटनगरका प्रमुखको रुपमा कार्यरत प्रेमप्रसाद सञ्जेलमाथि कार्यकक्षमै कुटपिट भएको हो ।
कुटपिटबाट सञ्जेलको अनुहारमा चोट लागेको जिल्ला प्रहरी कार्यालय मोरङका प्रहरी उपरीक्षक उपरीक्षक सन्तोष खड्काले जानकारी दिनुभयो । उहाँ माथि किन कुटपिट भयो भन्ने बारेमा अनुसन्धान भइरहेको उहाँको भनाई छ ।
कुटपिटमा संलग्न भएको आरोपमा प्रहरीले दुई महिला कर्मचारीलाई नियन्त्रणमा लिएको छ । प्रहरीले कार्यालयका सहयोगी कर्मचारी नेत्र भट्टराई र मेनुका सापकोटा कोइरालालाई नियन्त्रणमा लिएको हो । उनीहरु दुबै करारका कर्मचारी हुन् ।
सञ्जेलमाथि पेपर वेटको डल्लो, चप्पल, पञ्चिङ मेसिन लगायत प्रहार भएको प्रहरीले बताएको छ । प्रहरी स्रोतका अनुसार सञ्जेलसँग छलफल गर्नुछ भन्दै कार्यकक्षमा प्रवेश गरेका दुई जना कर्मचारीले काममा पेलेको र गालीगलौज गरेको भन्दै कुटपिट गरेको बताएका छन् ।
