गोरखा २५, बैशाख । गोरखा नगरपालिका भित्र बिहिबार (आज) दादुरा–रुबेला खोप अभियान सुरु भएको छ । जिल्लामा केही साता देखी दादुराको प्रकोप देखिन थाले पछि नगरपालिकाले आफ्नो सबै वडामा दादुरा–रुबेला खोप अभियान शुरु गरिएको नगरपालिकाले जनाएको छ ।
अभियान अन्र्तगत ६ महिना देखी ५ बर्ष मुनिका बालबालिकाहरुलाई भिटामिन ‘ए’ को साथै जुकाको औषधी खुवाउने’ र ‘९ महिना देखी ५ बर्ष सम्मका बालबालिकाहरुलाई दादुरा–रुबेला रोग विरुद्वको खोप लगाउन शुरु गरिएको हो । दादुरा–रुबेला अभियान तत्कालै सञ्चालनमा नल्याए महामारीको रुप लिन सक्ने आकल गर्दै नोबल कोरोना भाइरस (कोडिभ–१९) को संक्रमणका बेला पनि खोप अभियान सञ्चालन गर्न लागेको नगरपालिकाले जनाएको छ ।
नगरपालिकाले आजदेखि भोली र पर्सी गरी ३ दिन यो अभियान सञ्चालन गर्नेछ । अभियानमा ३ हजार ८०० बालबालिकालाई खोप र भिटामिन ‘ए’ खुवाउने लक्ष्य राखेको छ । १४ वटा वडा रहेको नगरपालिकामा ४९ खोप केन्द्र रहेको नगरपालिका स्वास्थ्य प्रमुख ईश्वर रेग्मीले जानकारी दिनुभयो ।
